Dølen var gjennom delar av fjoråret ei av Landslaget for lokalavisar (LLA) sine pilotavisar i prosjektet ”Levande lokalsamfunn”, eit prosjekt som tek sikte på å auke innslag av såkalla «public journalism», deltakande journalistikk, i norske aviser.
Dølen ser på denne måten å jobbe på som svært viktig i eit samfunnsperspektiv. Det å engasjere lesarane i større grad enn tidlegare, vil både vera ei styrke for avisa på sikt, men også for lokalsamfunnet. Avisa tek eit større ansvar for å vera ein aktiv og positiv bidragsytar i nærmiljøet. Likevel er det slik at deltakande journalistikk er langt meir tidkrevjande enn «vanleg» journalistikk, og vi har ikkje fått gjort like mykje som vi skulle ønske. Av dei konkrete tiltaka som har kome ut av prosjektet for vår del så langt, er spalta «Midt i verda», der vi tek opp ulike tema som lesarane er opptatte av. Vi har også innført Dølen «On tour», der vi ein gong i månaden fløtt redaksjonsmøtet ut på ein kafé, i ei kantane eller liknande, og let folk ta del i redaksjonsmøta våre. I løpet av valåret 2015 brukte Dølen denne metoden mellom anna i valdekninga, mellom anna ved å skape møteplassar mellom politikarar og veljarar i førekant av valet.
o Infrastruktur, veg og tettstadutvikling er saker Dølen har følgt tett over fleire år. Også i 2015 har Dølen følgt E6-utbygginga tett, og fleire vedtak knytt til vegen, har vore tatt opp i etterkant av oppslag i avisa vår. Ein av dei store debattane som har rasa i Midtdalen det siste året, er saka om kommunestruktur. Dølen har i høgste grad vore med i debatten, og formidla synspunkt frå båe sider. Frå leiarplass har vi tatt klart standpunkt for ein felles storkommune i Midtdalen, beståande av våre tre dekningskommunar. Ein annan stor sak har vore flyktningestraum og akuttmottak. Vi har og har hatt fem ulike mottak i våre tre kommunar, med ulike utfordringar. Vi føler vi har dekt flyktningekatastrofen på ein grundig og god måte.