Fjordabladet har heile tida vore oppteken av å formidle det viktigaste som skjer i lokalsamfunnet. Dette gjeld innanfor generelle nyhende, politikk, kultur, idrett/sport og folkeliv. Avisa er opptatt av folk sine demokratiske rettar og mogelegheita til å vere med å påverke. Difor har det vore viktig å følgje dei politiske prosessane av saker frå dei blir lagt fram frå kommuneadministrasjon til politisk handsaming i utval, formannskap og til slutt endeleg avgjerd i kommunestyret. Mange saker har fått andre utfall enn tilrådd, nettopp på grunn av at folk har vore aktive i den politiske debatten som lokalavisa har lagt opp til.
Næringsliv og lokal og regional utvikling har vore eit heilt sentrale område å jobbe intensivt og tett med.
I vårt område har organisering av spesialisthelsetenesta vore eit sentralt tema i mange år. Slik også i 2015, sjølv om debatten dette året har handla meir om tilbodet i andre kommunar og føretak. Men også denne debatten er viktig av fleire grunnar, og debatten har til tider gått livleg føre seg blant ulike interessegrupper i samfunnet.
På same måt som debatten rundt spesialisthelsetenesta har det også vore, og er, debatt rundt samferdsle. Debatten har handla om alt frå opprusting av stamvegnett, til kamp om prioritering og lokalisering av ferjefri kryssing av fjordar. Dette er ein tema som avisa har brukt mykje tid og spalteplass på.
Kommunevalet hausten 2015 var imøtesett med spenning. Fjordabladet brukte mykje tid og ressursar på lokalvalet. Som ved tidlegare val, gjennomførte avisa to store meiningsmålingar. Ei i april og ein ei veke før valet. Desse målingane har det vore veldig stor interesse rundt, fordi dei har vist seg å vere veldig pålitelege fordi vi i ein liten kommune har spurt mange om kva dei ville røysta. Slik vart det også denne gongen. Den siste målinga, som vart utført av Norfakta Markedsanalyse, var også denne gongen tett opp til det som vart valresultatet.
I tillegg til det som allereie er nemnt så har Fjordabladet gjennom mange år brukt bra med ressursar på å dekke det som skjer innanfor kulturlivet på ein god måte. Eid kommune er så heldige å ha eige operahus og med det også Opera Nordfjord. Opera Nordfjord er ei viktig brikke i kulturlivet, utanfor det som har direkte med Opera Nordfjord å gjere. Ei anna viktig årleg hending er Malakoff Rockfestival som årleg samlar over 20.000 festivaldeltakarar. Det er mykje for ein kommunen som har 6000 innbyggarar. Fjordabladet har gjennom dei 15 åra rockfestivalen har blitt arrangert, produsert ei eiga festivalavis.
Avisa si samfunnsrolle er å vere nummer ein på informasjon og nyhende i lokalsamfunnet. Samstundes som avisa er vaktbikkje, er den også ein viktig medspelar for vekst og utvikling.